Ish-shefi i shtabit të Izraelit, Dan Halutz, ka kritikuar kryeministrin Benjamin Netanyahu dhe ka theksuar se ai po udhëheq Izraeli “nga e keqja në më keq”, transmeton Anadolu.
Halutz lëshoi kritikat e tij gjatë një interviste me transmetuesin izraelit Channel 13, ndërsa Tel Avivi vazhdon një sulm shkatërrues kundër Rripit të Gazës që nga 7 tetori.
“Ai (Netanyahu) është përgjegjës dhe unë nuk njoh një vend në botë ku një kryeministër nuk do të ngjitej në kullën më të lartë dhe do të hidhej prej saj pas diçkaje të tillë”, tha Halutz, duke iu referuar sulmit nga grupi i rezistencës palestineze Hamas në Izraelin jugor në fillim të muajit tetor.
Sipas grupit palestinez, ai filloi sulmet ndaj bazave dhe vendbanimeve ushtarake izraelite përgjatë Rripit të Gazës “në përgjigje të sulmeve të përditshme të okupimit ndaj popullit palestinez dhe shenjtërive të tij, veçanërisht xhamisë Al-Aksa”.
“(Netanyahu) refuzon ta pranojë këtë, sepse në kalendarin e tij nuk ka 7 tetor, ka 6 dhe 8 dhe në 8 filloi lufta dhe ai po luftonte. Por ky njeri nuk lufton, po na çon nga e keqja në më keq”, tha Halutz.
Halutz, së bashku me figura të tjera izraelite, i kërkoi më parë Netanyahut të jepte dorëheqjen pasi kryeministri po shqyrton interesat e tij personale politike dhe po përpiqet të qëndrojë në pushtet pas përfundimit të luftimeve.
Netanyahu, kryeministri më jetëgjatë në historinë izraelite, refuzon të marrë përgjegjësinë për sulmet e 7 tetorit dhe kundërshton zgjedhjet e parakohshme.
Në Izrael po shtohen spekulimet se rezultatet e hetimeve për dështimin për t’u përballur me sulmet e Hamasit dhe rrjedhën e luftës kundër Gazës do të çojnë në shkarkimin e liderëve politikë, ushtarakë dhe të inteligjencës, të udhëhequr nga Netanyahu.
Izraeli po kryen ofensivën ushtarake në Gaza që nga sulmi ndërkufitar nga grupi i rezistencës palestineze Hamas më 7 tetor, kur sipas Tel Avivit u vranë rreth 1.200 njerëz.
Që atëherë, të paktën 32.200 palestinezë janë vrarë dhe sulmet kanë shkaktuar një shkatërrim masiv, zhvendosje të palestinezëve dhe uri.
Izraeli akuzohet për gjenocid në Gjykatën Ndërkombëtare të Drejtësisë, e cila në një vendim të përkohshëm në muajin janar urdhëroi Tel Avivin të ndalojë aktet e gjenocidit dhe të marrë masa për të garantuar ofrimin e ndihmës humanitare për civilët në Gaza.
