Gjykata në Peru ka dënuar ish-presidentin Alejandro Toledo me 20 vjet e gjashtë muaj burg, për korrupsion dhe pastrim parash. Prokurorët thonë se ai mori 35 milionë dollarë ryshfet nga një kompani ndërtimi braziliane, së cilës iu dha një kontratë për të ndërtuar një rrugë në jug të Perusë.
Toledo, 78 vjeç, ishte në detyrë midis 2001 dhe 2006. Ai u arrestua pesë vjet më parë në Kaliforni, ku kishte jetuar dhe punuar për shumë vite, dhe u ekstradua në Peru vitin e kaluar.
Kompania braziliane Odebrecht pranoi se kishte paguar miliona dollarë ryshfet për zyrtarët në të gjithë Amerikën Latine dhe SHBA, për të siguruar kontrata qeveritare.
Gjykatësja Inés Rojas tha se peruanët i kishin “besuar” Toledos si presidentin e tyre, “i ngarkuar me menaxhimin e financave publike” dhe përgjegjës për “mbrojtjen dhe sigurimin e përdorimit të saktë” të burimeve.
Në vitin 2019, një tjetër ish-president peruan, Alan García, qëlloi veten kur policia mbërriti në shtëpinë e tij për ta arrestuar mbi akuzat për ryshfet që përfshinte Odebrecht, i cili që atëherë ka ndryshuar emrin në Novonor.
