Një gjykatë pakistaneze dënoi sot ish-kryeministrin Imran Khan dhe bashkëshorten e tij Bushra Bibi me burg për një çështje korrupsioni në lidhje me Trustin Universitar Al Qadir, transmeton Anadolu.
Ish-kryeministri u dënua me 14 vjet pas grilave dhe gruaja e tij me shtatë, në vendimin e shtyrë tri herë të shpallur brenda burgut Adiala në qytetin Rawalpindi, ku Khan është mbajtur që nga gushti 2023.
Khan dhe Bibi u paditën në këtë rast në shkurtin e kaluar. Ata mund të apelojnë vendimin.
Byroja Kombëtare e Përgjegjshmërisë tha se Khan dhe gruaja e tij kanë marrë miliarda rupi dhe një pjesë të madhe toke të kushtueshme për të ndërtuar institucionin arsimor në këmbim të lëshimit të 190 milionë funteve për një magnat pronash në vitin 2020. Khan dhe gruaja e tij i kanë mohuar akuzat.
Organi kundër korrupsionit kishte nisur një hetim dhe arrestoi Khanin në maj 2023 për rastin, por arrestimi i tij më vonë u shpall i paligjshëm nga gjykata e lartë dhe ai u lirua me kusht.
Shuma u identifikua dhe u kthye në vend nga Agjencia Kombëtare e Krimeve e Mbretërisë së Bashkuar pas një marrëveshjeje me magnatin e pasurive të paluajtshme Malik Riaz në 2019.
Departamenti kundër korrupsionit pretendon se qeveria PTI e Khanit kishte arritur një marrëveshje me Riazin që shkaktoi një humbje prej mbi 239 milionë dollarësh në thesarin kombëtar, në një marrëveshje “favor për favor” me biznesmenin.
