Polaku Piotr Hofmanski, ish-president i Gjykatës Ndërkombëtare Penale (GJNP), kritikoi vendimin e Varshavës për të ofruar mbrojtje për kryeministrin izraelit Benjamin Netanyahu nga urdhërarresti i gjykatës nëse ai vendos të marrë pjesë në një ngjarje përkujtimore të çlirimit të Aushvicit, transmeton Anadolu.
Duke folur për gazetën polake Onet, Piotr Hofmanski tha: “Unë nuk di shumë për politikën, por nga pikëpamja juridike, çështja është shumë e qartë. Ekziston një urdhërarrest për kryeministrin e Izraelit me dyshimin se ka kryer krime lufte dhe shtetet janë të detyruara ta ekzekutojnë atë”.
Ai më tej shtoi se vendimi i qeverisë polake është një vendim thjesht politik, duke theksuar se qeveria polake po injoron qartë detyrimet e saj ligjore.
“Ekziston një detyrim ligjor dhe ndërkombëtar për të bashkëpunuar plotësisht me GJNP-në dhe një shtet që nuk e përmbush këtë detyrim e vendos veten në një situatë shumë të pakëndshme dhe pozicioni i tij ndërkombëtar kufizohet në mënyrë drastike”, argumentoi ai, duke shtuar:
“Kjo e vë në pikëpyetje vetë qëllimin e ekzistencës së GJNP-së nëse shtetet refuzojnë të përmbushin detyrimet e saj”.
Të enjten, presidenti polak Andrzej Duda i kërkoi qeverisë të sigurojë që Netanyahu të mund të marrë pjesë në 80-vjetorin e çlirimit të kampit të përqendrimit Aushvic, pa frikën e arrestimit për krimet e luftës në Gaza.
Më vonë, kabineti polak miratoi një rezolutë që siguronte pjesëmarrjen e sigurt të zyrtarëve izraelitë në ceremoninë që do të mbahet në kampin famëkeq të përqendrimit nazist.
GJNP lëshoi urdhërarreste në nëntor për kryeministrin izraelit Benjamin Netanyahu dhe ish-ministrin e mbrojtjes Yoav Gallant për krime lufte dhe krime kundër njerëzimit në Rripin e Gazës.
Që nga 7 tetori 2023, ushtria izraelite ka vazhduar me një luftë gjenocidale në Rripin e Gazës, duke vrarë më shumë se 46 mijë njerëz, shumica prej tyre gra dhe fëmijë, pavarësisht një rezolute të Këshillit të Sigurimit të OKB-së që bën thirrje për një armëpushim të menjëhershëm.
