Gazetarja italiane Cecilia Sala është liruar nga një burg iranian pas tre javësh në paraburgim dhe është rrugës për në Itali, transmeton Anadolu.
Ministria e Punëve të Jashtme e Italisë njoftoi se Sala, e cila u arrestua nga policia e Teheranit më 19 dhjetor derisa raportonte në kryeqytetin iranian, u lirua pas përpjekjeve diplomatike dhe të inteligjencës nga autoritetet italiane.
Sipas zyrës së kryeministres italiane Giorgia Meloni, “aeropolani që po sjell gazetaren Cecilia Sala në shtëpi u ngrit pak minuta më parë nga Teherani” dhe ajo pritet të mbërrijë në Romë pasditen e sotme.
“Falë punës intensive në kanalet diplomatike dhe të inteligjencës, bashkatdhetarja jonë është liruar nga autoritetet iraniane dhe po kthehet në Itali”, tha zyra e kryeministres.
Meloni gjithashtu ndau lajmin për lirimin e gazetares italiane në rrjetet sociale. Ajo shprehu mirënjohje për ata që u përfshinë në sigurimin e lirisë së gazetares Sala duke i “mundësuar të përqafojë familjen dhe kolegët e saj”.
Kryeministrja italiane gjithashtu tha se përmes një telefonate ka informuar personalisht prindërit e gazetares për lirimin e saj.
Ndalimi i gazetares italiane ngriti spekulime në mediat italiane për një lidhje të mundshme me arrestimin e inxhinierit iranian Mohammad Abedini, të kapur në aeroportin Malpensa të Milanos më 16 dhjetor, tre ditë para arrestimit të gazetares në Teheran. Abedini u ndalua me urdhër të SHBA-së.
Lirimi i saj vjen disa ditë pasi Meloni bëri një udhëtim të papritur në Florida për t’u takuar me presidentin e zgjedhur të SHBA-së, Donald Trump, në rezidencën e tij në Mar-a-Logo.
Kthimi i Sala-s shënon përfundimin e një përplasjeje të tensionuar diplomatike, me qeverinë e Melonit që mori meritat për negociatat prapa skenave për lirimin e saj.
