Hezbollahu tha sot se ka shënjestruar selinë e Ministrisë izraelite të Mbrojtjes në Tel Aviv me një skuadron dronësh, në sulmin e parë të tillë që nga shpërthimi i luftës ndërkufitare mes dy palëve vitin e kaluar, transmeton Anadolu.
Në një deklaratë, grupi libanez tha se gjuajti një skuadron dronësh të avancuar të drejtuar me saktësi në bazën Kirya në Tel Aviv, “duke goditur me saktësi objektivat e tij”.
Hezbollah tha se në bazën Kirya gjenden selia e Ministrisë së Mbrojtjes, Shtabi i Përgjithshëm, Qendra e Komandës së Luftës dhe autoriteti i kontrollit dhe mbikëqyrjes së forcave ajrore.
Nuk ka pasur asnjë koment të menjëhershëm nga autoritetet izraelite për sulmin.
Tensionet janë përshkallëzuar që kur Izraeli filloi një fushatë masive ajrore në Liban që nga fundi i shtatorit kundër atyre që pretendon se janë objektiva të Hezbollahut, në një përshkallëzim nga lufta ndërkufitare njëvjeçare midis Izraelit dhe grupit libanez që nga fillimi i ofensivës brutale të Izraelit në Gaza më 7 tetor 2023.
Gati 3.300 njerëz janë vrarë, mbi 14.200 të plagosur dhe më shumë se 1 milion njerëz janë zhvendosur nga sulmet izraelite që nga tetori i kaluar, sipas autoriteteve shëndetësore libaneze.
Izraeli më 1 tetor e zgjeroi konfliktin duke nisur një ofensivë tokësore në Libanin jugor.
