Vetëm 60,000 qytetarë dhe banorë të vaksinuar plotësisht të mbretërisë u lejuan të marrin pjesë në haxhin e sivjetmë për shkak të pandemisë së koronavirusit.
Haxhinjtë u nisën nga qyteti i shenjtë i Mekës për në luginën Mina gjatë mbrëmjes të së dielës, duke filluar kështu ritualet e haxhit që Arabia Saudite për të dytin vit me rradhë po e mban në formë të zvogëluar.
Që nga e shtuna, haxhinjtë grupe grupe kanë bërë ritualin e tavafit në Qabe dhe pastaj janë nisur për në Mina ku kalojnë natën në kampet e përgatitura për ta.
Pastaj gjatë ditës së hënë haxhinjtë dalin në rrafshnaltën e Arafatit, ku kryejnë njërin nga ritualet themelore të haxhit dhe ku qëndrojne deri në mbrëmje.
Pas lutjeve të bëra, besimtarët vizitojnë kodrën Jebel-i Rahme (Kodra e mëshirës) në të cilët thuhet se janë takuar njeriu i parë Ademi dhe gruaja e tij Hava.
Pas qëndrimit në Arafat, besimtarët do të marrin rrugën drejt Muzdelifes, dhe më pas kthehen në Mina, për të kryer ritualin e “hedhjes së guralecëve” në tre vendet e quajtur “xhemrat”.
Hedhja e guralecëve, simbolizon luftën kundër djallit.
Të marten, muslimanët anembanë botës fillojnë kremtimin e Kurban-Bajramit. /mesazhi.com
