Haradinaj-Stublla bashkëbisedoi me Palmer: SHBA e interesuar për Marrëveshjen e 4 Shtatorit dhe formalizmin e njohjes nga Izraeli

Ministrja e Punëve të Jashtme dhe Diasporës, Meliza Haradinaj-Stublla, zhvilloi sot një bisedë telefonike me Matthew Palmer, Zëvendës-Ndihmës Sekretar në Departamentin Amerikan të Shtetit dhe Përfaqësues Special për Ballkanin.

Siç raporton MPJD, ministrja Haradinaj-Stublla dhe Palmer biseduan gjerësisht për aktualitetin politik në Kosovë dhe SHBA dhe marrëdhëniet rajonale.

“Në emër të Kosovës shpreha mirënjohjen tonë për angazhimin dhe vëmendjen e palëkundur të SHBA-ve ndaj Kosovës, dhe bindjen se edhe në këto zgjedhje parlamentare, Kosova do të ruajë standardin e mbajtjes së zgjedhjeve demokratike e të lira”, ka deklaruar Haradinaj-Stublla.

Po sipas këtij raportimi, Palmer ka konfirmuar interesimin e Shteteve të Bashkuara për zhvillimet në Kosovë.

“Palmer nga ana e tij konfirmoi se SHBA-të do të vazhdojnë përcjelljen me interesim të lartë zhvillimet në Kosovë, veçanërisht në implementimin e Marrëveshjes së 4 Shtatorit, specifikisht formalizmin e marrëdhënieve diplomatike mes Republikës së Kosovës dhe Shtetit të Izraelit”.

Haradinaj-Stublla tha se kjo arritje kulmore për Kosovën, shtetësinë dhe subjektivitetin e saj ndërkombëtar po arrihet falë rolit kyç të SHBA-ve.

“Do të hapet një horizont të ri bashkëpunimi ndërkombëtar për Kosovën”, tha mes tjerash Haradinaj-Stublla.