Ushtria izraelite goditi një vend ku ishte e pranishme një peng femër, e cila do të lirohej në fazën e parë të marrëveshjes së armëpushimit të Gazës, tha sot grupi palestinez Hamas, transmeton Anadolu.
“Çdo agresion dhe bombardim në këtë fazë nga armiku (izraelit) mund ta kthejë lirinë e një të burgosuri në tragjedi”, tha Abu Obaida, zëdhënës i krahut të armatosur të grupit të rezistencës, Brigadat Qassam, në një deklaratë të shkurtër.
Ai, megjithatë, nuk dha asnjë detaj për gjendjen e pengut izraelit.
Katari njoftoi të mërkurën një marrëveshje armëpushimi për t’i dhënë fund mbi 15 muajve të sulmeve vdekjeprurëse izraelite në Rripin e Gazës, ku rreth 46.800 njerëz, kryesisht gra dhe fëmijë, janë vrarë që nga sulmi i Hamasit më 7 tetor 2023.
Marrëveshja trefazore, e vendosur të hyjë në fuqi të dielën, përfshin një shkëmbim të të burgosurve dhe qetësi të qëndrueshme, duke synuar një armëpushim të përhershëm dhe tërheqjen e forcave izraelite nga Gaza.
Sipas fazës së parë të marrëveshjes, 33 robër izraelitë do të lirohen në këmbim të një numri të burgosurish palestinezë.
