Gjyqtar i njohur për integritetin dhe drejtësinë e tij në fushën e gjelbër, Genc Nuza është deleguar nga UEFA për të drejtuar ndeshjen kualifikuese U21 për “Euro 2025”, midis Belgjikës dhe Maltës, e cila zhvillohet më 21 mars. Këtë e ka bërë të ditur Federata e Futbollit të Kosovës (FFK), të martën.
“Ky delegim vë në dukje besimin në rritje të UEFA-s në aftësitë dhe profesionalizmin e gjyqtarëve kosovarë”, ka shkruar FFK-ja.
Në këtë ndeshje, Nuza do të ketë për asistentë dy gjyqtarë të tjerë të spikatur, Edmond Zeqiri dhe Granit Hyseni, derisa Mentor Ajeti, do të jetë gjyqtar i katërt.
“Kësisoj, me një përvojë të gjatë në ndarjen e drejtësisë dhe me një përkushtim të vazhdueshëm për të ngritur standardet, Nuza dhe bashkëpunëtorët e tij do ta përfaqësojnë futbollin kosovar në një tjetër paraqitje të rëndësishme ndërkombëtare”, vazhdon njoftimi i FFK-së.
