Një gjykatës federal ka nënshkruar një urdhër të përkohshëm ndalimi që bllokon urdhrin ekzekutiv të presidentit Donald Trump për t’i dhënë fund të drejtës së shtetësisë për fëmijët e lindur në SHBA nga prindër që janë emigrantë të paligjshëm, transmeton Anadolu.
“Kam qenë në trupin gjykues për më shumë se katër dekada”, tha gjykatësi i qarkut amerikan John Coughenour nga një sallë gjyqi në Seattle.
“Nuk mbaj mend një rast tjetër ku rasti i paraqitur të jetë aq i qartë sa këtu. Ky është një urdhër flagrant anti-kushtetues”, tha gjykatësi Coughenour.
Amendamenti i 14-të i Kushtetutës i jep shtetësinë çdo personi të lindur brenda SHBA-së, por urdhri ekzekutiv i Trumpit synon të kufizojë të drejtën e shtetësisë së lindjes, duke mos lejuar që fëmijët e lindur në SHBA nga prindër që janë emigrantë të paligjshëm të bëhen shtetas amerikan.
Ekipi ligjor i presidentit amerikan shtoi përcaktime në urdhrin ekzekutiv që do të kërkonte që të paktën një prind të ishte shtetas amerikan ose banor i përhershëm. Urdhri përfshin edhe për foshnjat e nënave që ndodheshin në vend ligjërisht, por përkohësisht, si turistë, studentë universiteti ose punonjëse të përkohshme në SHBA me viza.
Coughenour bëri urdhrin e përkohshëm ndaj urdhrit të Trumpit pasi katër shtete të udhëhequra nga demokratët lëshuan urdhra të përkohshme kufizuese për të bllokuar zbatimin e masës. Katër prokurorët e përgjithshëm nga këto shtete argumentuan se politika e Trumpit do t’i hiqte në mënyrë të paligjshme të paktën 150 mijë fëmijëve të porsalindur për çdo vit shtetësinë që u takon atyre nga Amendamenti i 14-të.
Coughenour këshilloi avokatin e Departamentit të Drejtësisë, Brett Shumate, gjatë debateve të sotme.
“Sipas jush, a është ky urdhër ekzekutiv kushtetues?”, e pyeti gjykatësi avokatin Shumate.
“Po, ne mendojmë se është”, u përgjigj Shumate, duke shkaktuar zemërimin e gjyqtarit.
“E kam të vështirë të kuptoj se si një anëtar i avokatisë mund të deklarojë pa mëdyshje se ky është një rend kushtetues. Më ngatërron mendjen”, tha Coughenour, duke theksuar “ku ishin avokatët kur merrej ky vendim?”.
Urdhri i përkohshëm i gjykatësit për urdhrin e tij ekzekutiv është fillimi i një beteje të gjatë ligjore të pritshme që teston nëse presidenti ka fuqinë ligjore për të ri-interpretuar dhe ndryshuar Amendamentin e 14-të të Kushtetutës.
Prokurorët e përgjithshëm demokratë nga një total prej 22 shtetesh kanë ngritur të paktën gjashtë padi të ndryshme duke paditur Trumpin mbi urdhrin ekzekutiv të cilin ata e konsiderojnë jokushtetues.
Padia argumenton se urdhri ekzekutiv i Trumpit do të shkaktonte dëm të pa riparueshëm për fëmijët e lindur nga prindër pa dokumente, duke i penguar ata të gëzojnë të drejtën e tyre për “pjesëmarrje të plotë dhe mundësi në shoqërinë amerikane”.
