Gazetarja palestineze dhe 10 anëtarë të familjes së saj janë vrarë pas një sulmi ajror izraelit që goditi banesën e tyre në qytetin e Gazës, raporton agjencia zyrtare palestineze Wafa.
Sipas raportit, avionët luftarakë izraelitë bombarduan shtëpinë e gazetares Fatima Hassouneh në lagjen Tuffah, në lindje të qytetit të Gazës. Në sulm u vra ajo bashkë me pjesëtarë të familjes së saj, përfshirë gra dhe fëmijë.
Vdekja e Hassouneh e çon numrin e gazetarëve dhe punonjësve të medias palestinezë të vrarë që nga fillimi i luftës në Gaza në mbi 210, sipas burimeve nga mediat vendase. Organizatat ndërkombëtare të mediave dhe të drejtave të njeriut kanë dënuar vazhdimisht shënjestrimin e gazetarëve në këtë konflikt.
