Shirat e dendur kanë përmbytur shumë tenda në pjesën perëndimore të qytetit Deir al-Balah në pjesën qendrore të Rripit të Gazës, raporton Anadolu.
Palestinezët e zhvendosur nga sulmet izraelite dhe që tani jetojnë në tenda, po luftojnë për të vazhduar jetën në zonat e përmbytura.
Një marrëveshje armëpushimi në Gaza hyri në fuqi më 19 janar, duke ndalur luftën gjenocidale të Izraelit që ka vrarë të paktën 47.000 palestinezë, kryesisht gra dhe fëmijë, dhe ka plagosur më shumë se 110.700 që nga 7 tetori 2023.
Marrëveshja prej tre fazash e armëpushimit përfshin shkëmbimin e të burgosurve dhe qetësi të qëndrueshme, duke synuar një armëpushim të përhershëm dhe tërheqjen e forcave izraelite nga Gaza.
Sulmet izraelite kanë lënë më shumë se 11.000 njerëz të zhdukur, me shkatërrim të gjerë dhe një krizë humanitare që ka marrë jetën e shumë të moshuarve dhe fëmijëve në një nga fatkeqësitë më të këqija humanitare globale.
Gjykata Ndërkombëtare Penale lëshoi urdhra arresti në nëntor të vitit të kaluar për kryeministrin izraelit Benjamin Netanyahu dhe ish-ministrin e tij të mbrojtjes Yoav Gallant për krime lufte dhe krime kundër njerëzimit në Gaza.
Izraeli gjithashtu përballet me një çështje gjenocidi në Gjykatën Ndërkombëtare të Drejtësisë për luftën e tij në enklavën palestineze.
