Disa furra në Rripin e Gazës kanë ndaluar prodhimin e tyre pasi Izraeli mbylli kufijtë dhe pengoi hyrjen e ndihmave humanitare dhe karburantit, raporton Anadolu.
Furra e bukës “Al-Banna”, nga e cila përfitojnë mijëra familje palestineze në qytetin Deir al-Balah, u detyrua të ndalojë prodhimin për shkak të mungesës së bombolave të gazit dhe shterimit të rezervave të miellit.
Në qytetin Deir al-Balah në Gazën qendrore është paraqitur një mungesë e bombolave të gazit për gatim. Ky zhvillim ngre shqetësime se mund të ketë mungesë serioze ushqimore dhe katastrofë urie në Gaza.
Palestinezët në Rripin e Gazës nën bllokadë dhe sulmet izraelite, shpesh herë detyrohen të presin në radhë për orë të gjata për të gjetur miell dhe bukë.
Izraeli krahas sulmeve të dhunshme vazhdon praktikën e tij të urisë sistematike në Rripin e Gazës duke penguar hyrjen e produkteve ushqimore dhe të ndihmës. Pas armëpushimit që hyri në fuqi më 19 janar në Rripin e Gazës, ushtria izraelite rifilloi sulmet e saj të dhunshme mëngjesin e 18 marsit.
Mbi 1.000 palestinezë janë vrarë dhe 2.359 të tjerë janë plagosur në sulmet që ushtria izraelite rifilloi në Rripin e Gazës pas prishjes së armëpushimit më 18 mars.
Numri i palestinezëve të vrarë nga sulmet e Izraelit në Rripin e Gazës që nga 7 tetori 2023 është rritur në 50.357 ndërsa numri i të plagosurve në 114.400.
Thuhet se në Rripin e Gazës nën rrënoja ka ende mijëra të vdekur.
