Një sondazh i ri i publikuar sot ka treguar se gati gjysma e danezëve kundërshtojnë një projektligj që lejon vendosjen e përhershme të trupave dhe pajisjeve ushtarake amerikane në Danimarkë, i cili lidhet me një marrëveshje të mbrojtjes të vitit 2023 midis dy vendeve, transmeton Anadolu.
Sipas një sondazhi të kryer nga Epinion për median shtetërore DR, 43 për qind e të anketuarve e kanë kundërshtuar projektligjin, ndërsa 28 për qind e mbështesin atë dhe 29 për qind janë shprehur të pavendosur.
Marrëveshja, e cila u jep forcave amerikane akses të pakufizuar në bazat ajrore në Karup, Skrydstrup dhe Aalborg, pritet të zgjasë të paktën dhjetë vjet dhe nuk mund të revokohet, sipas DR-së.
Kur u nënshkrua marrëveshja, Joe Biden ishte presidenti i SHBA-së. Shqetësimet rreth synimeve amerikane, veçanërisht në lidhje me Grenlandën, kanë acaruar marrëdhëniet danezo-amerikane që kur presidenti Donald Trump shprehu synimin e tij për të marrë nën kontroll ishullin më të madh në botë, i cili është një territor autonom i Mbretërisë së Danimarkës, duke bërë që disa parti të bëjnë thirrje për shtyrje të votimit.
Shqyrtimi i parë i projektligjit është caktuar për më 11 prill, ndërsa miratimi përfundimtar pritet para pushimit veror. Pavarësisht skepticizmit publik, ministri i Mbrojtjes Troels Lund Poulsen këmbëngul se marrëveshja mbetet vendimtare për Danimarkën dhe Evropën.
“Unë nuk besoj se është në interesin e Danimarkës të përfundojë një marrëveshje që kemi bërë”, ka thënë Poulsen.
“Përkundrazi, ne duhet të bëjmë ç’është e mundur për të ruajtur një marrëveshje amerikane në Evropë”, ka shtuar ai.
Me Partinë Popullore Socialiste (SF) që tani mbështet projektligjin, vetëm Aleanca Kuq-Gjelbër dhe Alternativa mbeten kundër. Duket se me numrin e votave në favor të qeverisë, marrëveshja do ta kalojë pa probleme.
