Franca të martën mori presidencën e Këshillit të Sigurimit të OKB-së për muajin prill, njoftoi Ministria e saj e Jashtme.
Në një deklaratë, ministria theksoi angazhimin e Francës për të bashkëpunuar me partnerët e saj, me qëllim që këshilli të jetë në gjendje t’u përgjigjet sfidave dhe konflikteve të vazhdueshme.
“Përballë sfidave të sotme, parimi udhëheqës i presidencës sonë do të jetë sigurimi që dialogu multilateral të mbizotërojë mbi balancën e fuqisë,” thuhet në deklaratë.
Ajo nënvizoi se përpjekjet e Francës do të përqendrohen kryesisht në arritjen e një paqeje “të drejtë dhe të qëndrueshme” në luftën e vazhdueshme mes Rusisë dhe Ukrainës.
Në fund të muajit do të mbahet një takim ministror për të adresuar situatën në Lindjen e Mesme, shtoi deklarata.
Franca do t’i kushtojë gjithashtu “vëmendje të veçantë” situatës në rajonin e Liqeneve të Mëdha të Afrikës, si dhe në Sudanin, Sudanin e Jugut dhe Haitin.
“Presidenca e Francës do të marrë gjithashtu nisma për mbajtjen e takimeve të përqendruara në operacionet e paqeruajtjes dhe mbrojtjen e punonjësve humanitarë – dy angazhime kryesore për të mbështetur ata që ndihmojnë popullatat në nevojë,” thuhet në deklaratë.
Gjithashtu, Franca do të vazhdojë të avokojë për reforma në këshill për të përmirësuar përfaqësimin e tij dhe për të forcuar multilateralizmin efektiv.
“Gjatë gjithë presidencës së saj, parimi i vetëm udhëheqës i Francës do të jetë përkushtimi i saj ndaj multilateralizmit, sistemit të OKB-së dhe respektimit të ligjit ndërkombëtar në ruajtjen e paqes dhe sigurisë globale,” përfundon deklarata.
Franca mori presidencën nga Danimarka dhe në maj do t’ia kalojë Greqisë. /mesazhi
