Fondacioni Hind Rajab (HRF), një organizatë propalestineze, i ka paraqitur kërkesë zyrtare Nepalit për arrestimin e togerit izraelit Amit Nechmya dhe ekstradimin e tij në Argjentinë, ku ai përballet me akuza për krime lufte dhe gjenocid, transmeton Anadolu.
HRF-ja tha të hënën se “i ka kërkuar Nepalit që të arrestojë dhe ekstradojë kriminelin izraelit të luftës Amit Nechmya, tani i pranishëm atje. Lt. Nechmya u largua nga Argjentina, pasi HRF-ja kishte ngritur një çështje kundër tij për krime lufte në Gaza”.
HRF-ja ngriti akuza kundër Nechmyas në Buenos Aires më 2 janar për shkelje të rënda të së drejtës ndërkombëtare, si përdorimi i mburojave njerëzore në Jabalia dhe Rafah, plaçkitja dhe shkatërrimi i pronave në Rripin e Gazës dhe urdhërimi i zhvendosjes së detyruar në Khan Younis. HRF-ja tha se rasti mbështetet nga dëshmi dhe prova të dëshmitarëve.
Organizata shtoi se provat e fundit zbulojnë se Nechmya është përpjekur të shkatërrojë provat thelbësore të rolit të tij në krimet e luftës në Gaza, duke theksuar urgjencën e kapjes së tij.
E themeluar në mes të gjenocidit në Gaza, organizata fokusohet në llogaridhënien e atyre që janë përgjegjës për dhunë kundër palestinezëve, përfshirë autorët dhe nxitësit.
Organizata me bazë në Belgjikë gjithashtu paraqiti një ankesë në Gjykatën Ndërkombëtare Penale (GJNP) kundër më shumë se 1.000 ushtarëve izraelitë në tetor.
