Selektori i Kosovës në futboll, Franco Foda, ka publikuar emrat e lojtarëve në të cilët llogarit për ndeshjet me Lituaninë dhe Qipron.
Kosova do të jetë pa sulmuesin kryesor, Vedat Muriqi, që është i lënduar. Foda ka kthyer Edon Zhegrovën, Aro Muriqin e Florent Muslijën që ishin larguar nga grumbullimi i kaluar për shkelje disiplinore. Ndërkohë emër i ri është portieri Amir Shaipi.
Kosova më 12 tetor luan ndaj Lituanisë në Kaunas, ndërsa më 15 tetor e pret Qipron në Prishtinë. Ndeshjet i takojnë Ligës C të Ligës së Kombeve.
Selektori Franco Foda ka publikuar edhe një listë rezervë të Kosovës për ndeshjet e tetorit. Pjesë e saj është edhe Muharrem Jashari, që po shkëlqen në Ukrainë.
