Këshilli i Federatës Ndërkombëtare të Futbollit (FIFA) ka pranuar peticionin e Federatës Palestineze të Futbollit (PFA) kundër Izraelit për shkelje të të drejtave të njeriut dhe ka vendosur të nisë një hetim, transmeton Anadolu.
Vendimi u mor në mbledhjen e 74-të të FIFA-s në Cyrih për të vlerësuar aplikimin e PFA-së kundër Federatës së Futbollit të Izraelit.
“Komiteti Disiplinor i FIFA-s do të mandatohet të fillojë një hetim mbi veprën e supozuar të diskriminimit të ngritur nga Federata e Futbollit të Palestinës. Komiteti i qeverisjes, auditimit dhe përputhshmërisë së FIFA-s do t’i besohet misioni për të hetuar dhe më pas për të këshilluar Këshillin e FIFA-s për pjesëmarrjen në garat izraelite të ekipeve izraelite të futbollit që supozohet se janë të vendosura në territorin e Palestinës”, thuhet në njoftimin e Këshillit të FIFA-s.
Në muajin prill, PFA-ja kërkoi nga FIFA të sanksionojë dhe përjashtojë Izraelin për shkeljen e të drejtave të njeriut dhe ligjit humanitar në Rripin e Gazës.
Më vonë në muajin shtator, PFA-ja njoftoi se FIFA kishte marrë një opinion të pavarur ligjor që rekomandonte sanksione kundër Shoqatës së Futbollit të Izraelit për shkelje të të drejtave të njeriut dhe ligjit humanitar në Gaza.
Izraeli vazhdon ofensivën brutale në Rripin e Gazës që nga sulmi i grupit palestinez Hamas më 7 tetor të vitit të kaluar.
Sot më herët, Ministria e Shëndetësisë në territorin e shkatërruar nga lufta tha se rreth 100 palestinezë të tjerë u vranë në sulmet e pamëshirshme izraelite në Rripin e Gazës gjatë 24 orëve të fundit, duke e çuar numrin e përgjithshëm të vdekjeve që nga 7 tetori i kaluar në të paktën 41.788.
Sulmi izraelit ka zhvendosur pothuajse të gjithë popullsinë e territorit mes një bllokade të vazhdueshme që ka çuar në mungesa të mëdha të ushqimit, ujit të pastër dhe ilaçeve.
Fillon procedura e votimit për Kupën e Botës FIFA 2030 dhe 2034
Këshilli i FIFA-s gjithashtu njoftoi miratimin unanim të procedurës së votimit për emërimin e organizatorëve të Kupës së Botës FIFA për vitet 2030 dhe 2034.
Organizatorët e garës do të vendosen në kongresin e jashtëzakonshëm të FIFA-s më 11 dhjetor.
Përveç kësaj, këshilli miratoi një dritare regjistrimi për Kupën Botërore të Klubeve FIFA 2025, e cila do të zgjasë nga 1 qershori deri më 10 qershor.
Klubet do të jenë në gjendje të zëvendësojnë lojtarët gjatë një periudhe të kufizuar në garë nga 27 qershori deri më 3 korrik të vitit 2025, pasi kontratat e disa lojtarëve mund të skadojnë në mes të garës.
