Türkiye shpreson se marrëveshja e armëpushimit në Gaza do të hapë derën e paqes dhe stabilitetit të qëndrueshëm për “vëllezërit dhe motrat tona palestineze” si dhe për rajonin dhe mbarë njerëzimin, tha sot presidenti Recep Tayyip Erdoğan, transmeton Anadolu.
Türkiye do të vazhdojë të qëndrojë në krah të Gazës dhe të mobilizojë të gjitha mjetet për të ndihmuar Gazën të shërohet dhe të ngrihet në këmbë, deklaroi Erdoğan në X, duke vënë në dukje se Türkiye mirëpret marrëveshjen e armëpushimit midis grupit palestinez Hamas dhe Izraelit.
“Përshëndesim popullin heroik dhe bijtë dhe bijat trima të Gazës që mbrojnë me guxim tokën dhe liritë e tyre përballë sulmeve të paligjshme dhe çnjerëzore të Izraelit”, vuri në dukje ai.
Türkiye nuk i ka lënë kurrë vetëm “vëllezërit dhe motrat e saj palestineze” në luftën e tyre kundër shtypjes dhe shtypësve, shtoi Erdoğan.
Më herët, kryeministri dhe ministri i Jashtëm i Katarit, Mohammed bin Abdulrahman, njoftoi suksesin e ndërmjetësve në arritjen e një marrëveshjeje për armëpushim në Rripin e Gazës, duke theksuar se zbatimi i saj do të fillojë këtë të dielë.
