Presidenti turk, Recep Tayyip Erdoğan, ka bërë thirrje për një rishqyrtim të madh të Kombeve të Bashkuara (OKB), duke theksuar se pothuajse 200 vende në mbarë botën nuk mund t’i lihen në dorë pesë anëtarëve të përhershëm të Këshillit të Sigurimit (KS), transmeton Anadolu.
“OKB-ja duhet të reformohet plotësisht. Bota nuk mund të lihet në mëshirën e pesë vendeve të përhershme (anëtare të KS-OKB-së). Fati i 194 vendeve nuk mund të lihet në duart apo buzët e njërit prej këtyre pesë anëtarëve të përhershëm”, tha Erdoğan në një fjalim në Forumin Botëror të TRT-së, të mbajtur në Istanbul.
Duke theksuar se “Bota është më e madhe se pesë”, presidenti Erdoğan prej kohësh ka denoncuar sistemin e përhershëm të pesë anëtarëve të KS-OKB-së, sipas të cilit ato vende mund të vënë veton të vetme ndaj vendimeve të rëndësishme.
“Lufta Rusi-Ukrainë, së shpejti në vitin e saj të katërt, na ka treguar dobësinë e sistemit ndërkombëtar të bazuar në rregulla”, tha Erdoğan.
Në Gaza, theksoi më tej Erdoğan, janë testuar jo vetëm vlerat humanitare, por edhe besueshmëria e sistemit global, OKB-së, duke shtuar se asnjëri nuk e kaloi testin.
“Katastrofa humanitare është lejuar për shkak të turpit të Holokaustit, por kjo është një rrugë pa krye, fatkeqësi”, tha presidenti Erdoğan, duke iu referuar mënyrës se si faji i vendeve perëndimore për Holokaustin i bëri ata të mos kritikojnë Izraelin, i cili ka kryer për më shumë se një vit po kryen gjenocid në Gaza.
“A mund të themi ‘nuk është puna jonë’ për agresionin izraelit që rrezikon jo vetëm qytetarët e vetë, por të gjitha ata që jetojnë në rajon? Kur ka paqe, kur mund të jetojmë së bashku në paqe, pse kjo gjakderdhje, konflikte, luftë? Nëse nuk veprojmë sot, kur do të veprojmë”, u shpreh Erdoğan.
“Dhimbja e të shtypurve në Gaza, Palestinë dhe Liban është e jona”, tha presidenti turk, duke shtuar se “pëlqimi ndaj shtypjes është shtypje”, duke iu referuar mbështetësve të gjenocidit dhe politikave shtypëse të Izraelit.
Turqia, siç theksoi ai, po bën atë që po bën për “hir të paqes, drejtësisë dhe sigurisë së të gjithë rajonit”.
Përgjatë gjithë historisë, theksoi presidenti Erdoğan, kombi turk ka hapur gjithmonë “dyert e tij gjerësisht” për këdo që është përballur me shtypjen, qoftë hebre apo i krishterë.
“Për ata që mund ta vlerësojnë siç duhet, çdo krizë ka potencialin të jetë paralajmërues i një epoke të re dhe pioniere e një fillimi të ri. Njerëzimi është në një pikë kthese. Po ndodhin ngjarje që do të ndikojnë jo vetëm në 5-10 vitet e ardhshme, por edhe në të ardhmen e nipërve tanë”, tha Erdoğan.
Ai gjithashtu uroi që armëpushimi i arritur midis Izraelit dhe Libanit të jetë i përhershëm.
Forumi Botëror i TRT-së, i organizuar nga transmetuesi kombëtar turk, përfundon nesër.
