Emiri i Katarit, Tamim bin Hamad Al-Thani, ka zhvilluar bisedime me kryeministrin e Mbretërisë së Bashkuar, Keir Starmer, për të shqyrtuar rrugët diplomatike për reduktimin e agresionit izraelit në territoret e pushtuara palestineze dhe Liban, transmeton Anadolu.
Sipas një deklarate nga Këshilli i Emirit të Katarit, biseda është zhvilluar në një telefonatë nga Starmer.
Të dy liderët diskutuan marrëdhëniet strategjike dypalëshe të vendeve të tyre, si dhe zhvillimet rajonale dhe ndërkombëtare me interes të përbashkët, thuhet në deklaratë.
Katari ka thënë se diskutimet kanë mbuluar “situatën aktuale në Gaza, territoret e pushtuara palestineze dhe Liban, me theks në mjetet diplomatike për të de-përshkallëzuar situatën dhe për të arritur një armëpushim”.
Përpjekjet ndërmjetësuese të udhëhequra nga SHBA-ja, Egjipti dhe Katari për të arritur një marrëveshje armëpushimi në Gaza dhe shkëmbim të të burgosurve midis Izraelit dhe Hamasit kanë dështuar për shkak të refuzimit të kryeministrit izraelit, Benjamin Netanyahu, për të ndalur luftën.
Ushtria izraelite ka vazhduar ofensivën shkatërruese në Rripin e Gazës që nga tetori i vitit të kaluar, pavarësisht nga një rezolutë e Këshillit të Sigurimit të OKB-së që kërkon armëpushim të menjëhershëm.
Më shumë se 43 mijë njerëz janë vrarë që atëherë, kryesisht gra dhe fëmijë, si dhe mbi 101.500 të tjerë janë plagosur, sipas autoriteteve lokale shëndetësore.
Sulmet izraelite kanë zhvendosur pothuajse gjithë popullsinë e territorit, krahas një bllokade të vazhdueshme që ka çuar në mungesa të mëdha të ushqimit, ujit të pastër dhe ilaçeve.
Izraeli gjithashtu përballet me akuza për gjenocid në Gjykatën Ndërkombëtare të Drejtësisë për luftën e tij brutale ndaj Gazës.
