Sateliti i Emirateve të Bashkuara Arabe (EBA), i zhvilluar në kuadër të misionit të Marsit, me sukses është lançuar nga Japonia, transmeton Anadolu Agency (AA).
Sateliti i quajtur “Hope” (Shpresë), u lançua në Mars me raketën H-2A nga Qendra Hapësinore Tanegashime e Japonisë.
Pritet që sateliti vëzhgues të mbërrijë në Mars brenda 200 ditëve, për të kryer punime në lidhje me motin dhe ndryshimin e klimës.
“Kjo është dhuratë nga EBA për botën dhe tregues se EBA bashkë me botën arabe posedon kapacitetin e realizimit të sukseseve të mëdha”, tha ministri i Edukimit të EBA, Hussain Al Hammadi.
EBA javën e kaluar u përpoq të lançojë satelitin dy herë, por për shkak të kushteve të këqija të motit operacioni ishte shtyrë.
Në rast se sateliti “Hope” arrin synimin me sukses, EBA do të bëhet vendi i parë arab që dërgon satelit në Mars.
