Agjencia e Kombeve të Bashkuara për Ndihmën dhe Punën për Refugjatët Palestinë (UNRWA) thotë se ndërsa Jabalia vazhdon të jetë nën rrethimin izraelit, “ekipeve humanitare dhe të shpëtimit duhet t’u lejohet aksesi pa vonesë për të shpëtuar jetë”.
Në një postim në X, UNRWA tha: “Operacionet e vazhdueshme ushtarake në Gazën veriore po vënë dhjetëra mijëra njerëz në rrezik të madh dhe po ndërpresin aksesin në gjërat e tyre thelbësore për mbijetesë, duke përfshirë ujin”.
Më parë, Joyce Msuya, ushtruese e detyrës së shefit humanitar në Zyrën e OKB-së për Koordinimin e Çështjeve Humanitare (OCHA), tha se njerëzit janë ende të bllokuar nën rrënoja pas një nate vdekjeprurëse bombardimesh dhe reaguesit e parë po bllokohen të arrijnë tek ata. /mesazhi
