Pesë biseda të reja telefonike, dëshmojnë edhe më tej implikimin e Adem Grabovcit në veprime tashmë të dyshuara penale. Me veprimet e tij të dëshmuara me biseda telefonike, Grabovci shfaq hapur ndikimin gjithandej.
Armend Kelmendi planifikonte ngritje akademike. Por, për të arritur këtë, i duhej ndihma e Adem Grabovcit.
Kelmendi i kishte telefonuar ish-shefit të Grupit Parlamentar të PDK-së për ta ndihmuar që të regjistronte studimet pasdiplomike në Universitetin e Prishtinës që drejtohej nga Mujë Rugova. Muja ishte nën kontrollin e plotë të Grabovcit.
Megjithatë, Grabovci nuk i kishte premtuar Kelmendit se do ta ndihmonte. I kishte thënë se është i zënë dhe se do të bisedonin një javë më vonë.
Në serinë e XXI-të të Dosjes së Shefave, Insajderi sjell pesë biseda tjera telefonike të Adem Grabovcit, me persona jopublik. Atij, i kërkohet ndihmë për gjithçka. Mirëpo, Grabovci fokusin kryesor e ka në sistemimin e njerëzve të partisë së tij në institucione shtetërore.
Më së shumti, Grabovci interesohet për Arbreshën. I telefonon një zyrtari për ta pyetur se a ka konkurruar ajo. Jep udhëzime për zgjedhjen e saj në Bordin e një institucioni që nuk i përmendet emri.
Armend Kelmendi, Grabovcin e quan kryetar. Pa e zgjatur shumë, ai kërkon ndihmë për të regjistruar studimet master.
“Kryetar, kshtu s’pe zgati ma shumë, veç kur t’ki kohë, mu taku…, se sun po foli n’telefon… Kshtu jom t’u punu në master, e po kom qef mu regjistru… Kisha pas qef live, kur mujmë m’u taku”, e lutë Kelmendi, Grabovcin.
“Hajt, kqyrum bisedojmë kur shihum. Hajt, kqyrym se jom nxon unë nihere, jo qito ditë jo… Deri javën e ardhshme, s’muna se jom me buxhetin, jom t’u e aprovu, e kom punë shumë”, thotë Grabovci.
Interesimin për zgjedhjen e Arbreshës anëtare të një Bordi, Grabovci e shpreh gjatë një bisede telefonike me një zyrtar shteti, të cilit nuk ia përmend emrin. Nga biseda shihet se ata janë të afërt.
“Hej, a ka konkuru, Arbnesha, n’bordin që i kom pa thanë”, e pyet Grabovci.
“Jo, valla nestra. Kem met t’u e prit Ahmetin. Pat thanë kjo punë osht e kryme, ti pate thanë a din le të zgedh a din n’cilin ven don edhe kem met t’u e prit qita… ku punon Ahmeti aty”, përgjigjet bashkëbiseduesi.
“Ëhë…, e ma mirë e ka pas kha, po nejse hajde, u bo”, thotë Grabovci, duke lënë të kuptohet se më i mirë do të ishte vendi i punës ku i kishte thënë ai, sesa te Ahmeti.
Arben Kabashi i kishte telefonuar sërish, Adem Grabovcit. Biseda e parë është publikuar nëserinë e XIX-të të përgjimeve telefonike. Grabovci, i thotë Kabashit se ka biseduar me Fatmirin për vendin e punës që donte dhe ia kërkonte numrin e aplikacionit.
“E di, m’ka thanë Fatmiri… Unë s’muj, me bo zhurmë… Puntë, kryhen qetë, kadal… Unë, e kom dhanë porosinë, po çoma edhe niher numrin e aplikacionit, se unë veç si emër e kom dhanë… E, çoma edhe numrin e aplikacionit, osht edhe ma lehtë”, thotë Grabovci.
“E ki, e ki, qind për qind”, e garanton Grabovci.
Emri i një personi tjetër dhe i profesor Esetit nuk ishin në listën e Ministrisë së Transportit për punësim. Grabovci, që ishte zëvendësministër një kohë në këtë Ministri, mbetet i habitur se kur e merr vesh këtë.
“E mora, ni konfirmim, nifarë lajmrimi, se është bo nifarë liste, prej 30-40 vetëve dikun, e nuk jem as unë as profesori Eset, e thash, t’njoftoj me kohë”, i thotë Grabovcit ky person.
“Komisioni, komisioni që e ka bo seleksionimin e kandidatëve, e ka bo ni seleksionim, e i ka zgjedh nja 30-40 vetë, dikun përafërsisht, për me kalu ma tutje, n’fazën e dytë, t’intervistimit, e…, emri jem edhe emri i profesorit Eset nuk ishim”, sqaron më tej ai.
“Qy, qy”, shton Grabovci.
“Edhe ish Skënder, ky Skënderi ish aty, ky që u kanë te ju, sekretar, N’ministri t’Infrastrukturës… Ai, ish kryesus, i atij komisioni”, shton ky kandidat.
Grabovcit nuk i pëlqen fakti se Skënder Krasniqi, një aktivistë i LDK-së dhe ish-sekretar në MTPT, ishte në krye të komisionit.
“Eh nanën jau qifsha”, përgjigjet Grabovci.
“Ai, kish pa thanë, mu sum ka jep emër kërkush, as ni emër, s’ma kanë dhan”, shton më tej kandidati. “E thash, tregoj me kohë, bile nëse osht e mundshme me bo naj gja”.
“Okej, okej…, hajt dil, dil nesër te unë në zyrë”, i thotë Grabovci.
