Nuk kishte udhëtuar në Alicante për të ndjekur ish-skuadrën direkt nga stadiumi, por gjithsesi e kishte gjetur një mënyrë për të vëzhguar kuqezinjtë.
Dje Gianni De Biasi u ul para TV-së, bashkë me drejtorin sportiv të Alavesit, skuadra që drejton prej vetëm dy javësh
Natyrisht, interesi i italianit nuk ishte thjesht të shikonte takimin si një ish-trajner që bëri historinë me Shqipërinë, por edhe për të vënë në dijeni drejtuesit e klubit spanjoll për lojtarët kuqezi që në afatin kalimtar të janarit mund të futen në objektivin e Alavesit.
I kontaktuar nga “Panorama Sport” pas ndeshjes Spanjë- Shqipëri 3-0, De Biazi nuk ngurroi të bënte edhe një koment.
“Nuk isha në stadium, e ndoqa takimin nga TV, bashkë me drejtorin e klubit. Të jem i sinqertë, Shqipëria nuk luajti keq. Duhet të dini se Spanja mundi edhe Italinë me të njëjtin rezultat”.
“Pastaj, nuk duhet të harrojmë që edhe ndaj Maqedonisë ishte shumë e vështirë, por që gjithsesi Shqipëria mori pikë. Ju e patë që edhe Italia nuk shkoi më shumë se barazimi ndaj Maqedonisë.
Dihen diferencat me Spanjën, kështu që nuk është për ta bërë dramë”, është shprehur shkurtimisht ish-trajneri kuqezi./Mesazhi/
