Ministri turk i Punëve të Jashtme i Türkiye-s, Mevlüt Çavuşoğlu, ka deklaruar se rreth 60 për qind e krizave dhe konflikteve në botë po ndodhin në gjeografinë e Türkiye-s dhe se ato shqetësojnë drejtpërdrejt vendin, raporton Anadolu Agency (AA).
Duke folur në Konferencën Sipërmarrëse dhe Humanitare të Politikës së Jashtme Turke në provincën Bingöl, ministri Çavuşoğlu tha se pavarësisht gjithë këtyre vështirësive, Türkiye është bërë vend që ka rritur fuqinë e saj rajonale.
“Prandaj, barra jonë është e rëndë. Kjo duhet të tejkalohet”, tha Çavuşoğlu.
Türkiye, tha ai, u afrohet të gjitha vendeve në mënyrë të barabartë pa diskriminim, si dhe shtoi se ata po punojnë për drejtësinë dhe për të zgjidhur problemet.
“Türkiye është bërë një vend i qendrës së gravitetit në hartën botërore. Shumë vendime të rëndësishme tani po marrin formë këtu”, tha Çavuşoğlu.
Ai tha se bota po ndryshon me shpejtësi dhe çdo vend po testohet me vullnetin, qëndrueshmërinë dhe elementët e aftësisë së tij përballë këtyre zhvillimeve.
“Këtu ka mbaruar pandemia (COVID-19) dhe ka filluar lufta në Ukrainë. Ka kriza të rënda si në ushqim ashtu edhe në energji. Këto kriza kanë filluar të thellohen. Recesioni ekonomik global fatkeqësisht ka filluar të ndihet kudo”, tha Çavuşoğlu, duke shtuar se krizat ndihen jo vetëm në rajonet e tyre, por edhe në vendet e largëta.
“Për shembull, kriza e Ukrainës shkakton urinë në Afrikë, një krizë migracioni në Evropë dhe një krizë prodhimi në Amerikën Latine”, shpjegoi ai. /aa
