Bisedimet me Serbinë të pakuptimta

Kuvendi i Kosovës nuk ka miratuar një rezolutë në të cilin si pikë ka qenë edhe pezullimi i bisedimeve me Serbinë, deri në lirimin e kolonelit Nehat Thaçi dhe shfuqizimin e të gjitha fletë arresteve të lëshuara nga Beogradi për ish–ushtarët e UÇK-së.

Kërkesa për ndalim të bisedimeve mes Kosovës dhe Serbisë është riaktualizuar pas arrestimit të Nehat Thaçit më 29 shtator.

Ndërsa për profesorin e marrëdhënieve ndërkombëtare, Afrim Hoti vazhdimi i bisedimeve me Serbinë në këto rrethanë është i pakuptimtë.

Ai në një deklaratë për lajmi.net ka thënë se nuk ka kuptim që të vazhdohen bisedimet kur Kosova synon t’i zgjidh çështjet përmes dialogut, kurse Serbia jo vetëm që nuk zbaton marrëveshjet e arritura, por edhe bënë arrestimin e zyrtarëve të lartë të Kosovës.

“Vazhdimi i bisedimeve mendoj që është krejtësisht i pakuptueshëm kur ne provojmë t’i zgjidhim çështjet me dialog, përmes bisedimeve ndërkohë që pala tjetër jo vetëm që është destruktive dhe e bishton zbatimin e marrëveshjes, por përkundrazi merr hapa të tjerë siç është rasti i arrestimit të Nehat Thaçit.

“Mendoj që në rrethana të tilla Kosova vendoset në presion të paparë dhe vazhdimin e bisedimeve e bënë krejtësisht të pakuptimtë”, ka thënë Hoti për lajmi.net.