Binjakët e porsalindur u vranë të martën nga një sulm ajror izraelit në Rripin e Gazës, ndërsa babai i tyre ishte në një qendër komunale për t’i regjistruar. Asseri, djali, dhe Ayssela, vajza, ishin vetëm katër ditësh kur babai i tyre, Mohammed Abu al-Qumsan, shkoi për të marrë certifikatat e lindjes së tyre.
Gjatë kohës që ai ishte jashtë, fqinjët e telefonuan për ta informuar se shtëpia e tij në Deir al Balah ishte bombarduar. Në sulm u vranë gjithashtu edhe bashkëshortja e tij dhe gjyshja e binjakëve.
“Nuk e di çfarë ndodhi. Më thanë se një predhë goditi shtëpinë,” tha ai. “Nuk pata kohë as t’i gëzohem lindjes së tyre,” shtoi ai.
Sipas Ministrisë së Shëndetësisë në Gazë, 115 foshnje të porsalindura janë vrarë që nga fillimi i luftës. Lufta e Izraelit në Gazë ka lënë rreth 40,000 palestinezë të vdekur dhe mbi 91,700 të tjerë të plagosur, sipas zyrtarëve shëndetësorë në enklavë.
