Përfaqësuesja e Lartë e Bashkimit Evropian (BE) për Punët e Jashtme dhe Politikën e Sigurisë Kaja Kallas njoftoi se është takuar me kryeministrin palestinez Mohammed Mustafa në Bruksel, duke shtuar se planifikojnë të dërgojnë një mision vëzhgimi të BE-së në Portën Kufitare Rafah, transmeton Anadolu.
Nëpërmjet një deklarate në llogarinë e saj në rrjetet sociale, Kallas ka bërë të ditur se është takuar me kryeministrin palestinez Mustafa në Bruksel, duke theksuar rëndësinë e mbajtjes së këtij takimi kaq shpejt pas marrëveshjes së armëpushimit.
“Kjo marrëveshje mund të jetë hap drejt paqes së qëndrueshme, por ne të gjithë e dimë se ka shumë sfida të vështira përpara”, tha Kallas, duke shtuar se BE-ja është e gatshme të ndihmojë me ndihmën humanitare dhe rindërtimin.
“Ne jemi gjithashtu në diskutime për të rivendosur misionin tonë të vëzhgimit në Rafah për të siguruar stabilitetin në kufi”, tha më tej Kallas.
Në ditën e parë të kontakteve dyditore, kryeministri palestinez Mustafa u takua veçmas me Presidentin e Këshillit të BE-së, Antonio Costa, Presidenten e Parlamentit Evropian (PE), Roberta Metsola, Komisaren e BE-së për Mesdheun, Dubravka Suica, dhe Komisaren e BE-së për Barazi, Gatishmëri dhe Menaxhimin e Krizave, Hadja Lahbib.
Në një deklaratë pas bisedimeve, zyrtarët e BE-së theksuan rëndësinë e zbatimit të armëpushimit, përshpejtimin e fluksit të ndihmës humanitare në Gaza dhe rindërtimin e rajonit.
– Misioni vëzhgues i BE-së
Pretendimet se SHBA-ja donte që BE-ja të merrte kontrollin e kalimit kufitar Rafah midis Egjiptit dhe Gazës u ngritën në maj të vitit të kaluar kur u përmend armëpushimi.
Megjithatë, Komisioni i BE-së vuri në dukje në atë kohë se detyrat dhe aktivitetet e Misionit të Asistencës Kufitare të BE-së (EUBAM) u përcaktuan në një proces të fshehtë me votën unanime të 27 vendeve anëtare të BE-së dhe raportoi se nuk kishte marrëveshje për këtë çështje ende.
