Bayerni fiton përballjen e gjigantëve

Një gol i Kim Min-jae e vendosi përballjen e gjigantëve të futbollit.

Të martën mbrëma në “Allianz Arena” në Munih, Bayerni fitoi 1:0 ndaj kampionit francez, Paris Saint-Germain. Ndeshja i takoi xhiros së pestë të Ligës së Kampionëve.

Golin e vlefshëm tri pikë, mbrojtësi i qendrës Kim e shënoi në minutën e 38-të.

Gjërat u bënë më të lehta për bavarezët në minutën e 57-të, kur u përjashtua Ousmane Dembele, njëri prej lojtarëve kryesorë të Parisit. Ai u ndëshkua me kartonin e dytë të verdhë.

Bayerni e shënoi fitoren e tretë. Me nëntë pikë renditet në pozitën e 11-të, nga 36 skuadra sa janë në fazën e ligës.

Për Parisin gjërat bëhen dukshëm më të vështira.

Gjiganti francez i ka vetëm katër pikë në pozitën e 26-të. Deri në fund të fazës së ligës Parisi i ka edhe tri ndeshje.