Barcelona është kualifikuar në çerekfinale të Ligës së Kampionëve.
Të martën mbrëma në Barcelonë, skuadra e Xavit fitoi 3:1 ndaj Napolit për të bërë vend në mesin e tetë skuadrave më të mira evropiane. Ndeshja e parë në Napoli kishte përfunduar 1:1 dhe kështu Barça me rezultatin e përgjithshëm 4:2 avancoi nga një e teta e finales.
Barcelona herët në ndeshje krijoi epërsi prej 2:0.
Fermin Lopez shënoi për 1:0 në minutën e 15-të, ndërsa dy minuta më pas Joao Cancelo realizoi për 2:0.
Kampioni i Italisë u kthye në lojë në minutën e 30-të, kur realizoi Amir Rrahmani. Kapiteni i Kosovës e realizoi golin e parë në Champions. Ishte gol i bukur i Rrahmanit, i shënuar ndaj njërës prej skuadrave më të mëdha në Evropë.
Çështja e fituesit u mbyll në minutën e 83-të, kur për 3:1 realizoi Robert Lewandowski. Ai finalizoi një aksion të bukur të Barcelonës.
