Azerbajxhani njoftoi se forcat armene gjatë natës qëlluan ndaj pozicioneve të saj ushtarake në rajonin perëndimor Laçin, transmeton Anadolu.
Në një deklaratë të Ministrisë së Mbrojtjes të Azerbajxhanit thuhet se forcat e saj pranë fshatrave Zabukh dhe Jaghazur u qëlluan nga forcat armene mbrëmë vonë, midis orës 22:00 dhe 22:10 sipas kohës lokale.
“Dëshirojmë t’iu informojmë se ditët e fundit, njësitë e Forcave të Armatosura të Armenisë kanë qëlluar disa herë mbi pozicionet tona dhe të gjitha këto raste janë regjistruar në përputhje me rrethanat”, thuhet në deklaratë.
Ministria e Mbrojtjes së Armenisë mohoi më vonë deklaratën e Azerbajxhanit, duke pretenduar se “nuk korrespondon me realitetin”.
Ky është incidenti i parë i këtij lloji që raportohet nga Baku që nga shtatori i vitit 2024.
Marrëdhëniet midis dy vendeve kanë qenë të tensionuara që nga viti 1991, kur ushtria armene pushtoi Karabakun, një territor i njohur ndërkombëtarisht si pjesë e Azerbajxhanit si dhe shtatë rajone ngjitur, përfshirë Laçinin.
Pjesa më e madhe e territorit u çlirua nga Azerbajxhani gjatë një lufte 44-ditore në vjeshtën e vitit 2020, e cila përfundoi pas një marrëveshjeje paqeje të ndërmjetësuar nga Rusia që hapi derën për bisedimet e normalizimit dhe përcaktimin e kufirit.
Në shtator 2023, Azerbajxhani vendosi sovranitet të plotë në Karabak pas një “operacioni anti-terrorist” pas të cilit forcat separatiste në rajon u dorëzuan.
