Të paktën 46.960 palestinezë janë vrarë në luftën gjenocidale të Izraelit në Rripin e Gazës që nga 7 tetori 2023, thanë sot autoritetet lokale, transmeton Anadolu.
“Rreth 30.000 gra dhe fëmijë janë në mesin e viktimave”, tha në një deklaratë zyra mediale e qeverisë së Gazës.
Zyra tha se mbi 14.200 njerëz janë zhdukur që nga fillimi i luftës izraelite në tetor 2023.
“Pushtuesi (izraelit) ka zhdukur 2.092 familje të tëra palestineze nga regjistri civil, duke vrarë 5.967 njerëz”, tha ajo, duke cituar shifra të Ministrisë së Shëndetësisë.
Sipas zyrës mediale, 17.861 fëmijë janë vrarë, përfshirë 214 foshnja të porsalindura, ndërsa 808 fëmijë të tjerë nën një vit kanë humbur po ashtu jetën në sulmet izraelite.
“Të paktën 12.316 gra janë vrarë gjithashtu, përveç 1.155 mjekëve, 94 pjesëtarëve të mbrojtjes civile dhe 205 gazetarëve”, shtoi ajo.
Zyra mediale njoftoi se 44 palestinezë kanë vdekur nga uria për shkak të mungesës së madhe të ushqimit dhe tetë kanë ngrirë deri në vdekje, duke përfshirë shtatë fëmijë.
Ushtria izraelite ka hedhur rreth 100.000 ton eksploziv në Rripin e Gazës, duke çuar në shkatërrim masiv në gjithë enklavën palestineze, theksoi ajo.
Faza e parë gjashtëjavore e marrëveshjes së armëpushimit të Gazës hyri në fuqi të dielën, duke pezulluar luftën gjenocidale të Izraelit në enklavë.
Marrëveshja 3-fazore e armëpushimit përfshin shkëmbimin e të burgosurve dhe qetësi të qëndrueshme, duke synuar një armëpushim të përhershëm dhe tërheqjen e forcave izraelite nga Gaza.
Gjykata Ndërkombëtare Penale lëshoi urdhra arresti në nëntor për kryeministrin izraelit Benjamin Netanyahu dhe ish-ministrin e tij të mbrojtjes Yoav Gallant për krime lufte dhe krime kundër njerëzimit në Gaza.
Izraeli gjithashtu përballet me një çështje gjenocidi në Gjykatën Ndërkombëtare të Drejtësisë për luftën e tij në enklavë.
