Autoritetet urdhëruan sot banorët e disa qyteteve në shtetin juglindor të Australisë Victoria të evakuohen për shkak të zjarreve pyjore në afërsi, raportoi media vendase, transmeton Anadolu.
Sipas Korporatës Australiane të Transmetimeve (ABC), Autoriteti i Zjarrfikësve të Shtetit (CFA) ka lëshuar paralajmërime për t’u larguar menjëherë për disa komunitete në rrethet perëndimore dhe jugperëndimore të shtetit, ndërsa ekuipazhet po luftonin për t’iu përgjigjur zjarreve.
CFA-ja tha se një zjarr “jashtë kontrollit” është rreth 38 kilometra në jug të qytetit Ballarat dhe po lëviz në jug.
Njerëzit në zonë po këshillohen se “largimi tani” është alternativa më e sigurt, ndërsa vendasve u kërkohet të monitorojnë nga afër informacionet e urgjencës dhe të mos kthehen në shtëpi nëse janë larg.
“Mos pritni, largimi tani është alternativa më e sigurt”, bëri thirrje CFA-ja.
“Kushtet mund të ndryshojnë dhe të përkeqësohen shumë shpejt. Shërbimet e urgjencës mund të mos jenë në gjendje t’ju ndihmojnë nëse vendosni të qëndroni. Duke zgjedhur të qëndroni, ju dhe familja juaj mund të jeni në rrezik të lëndimeve serioze ose vdekjes”, shtoi ajo.
Byroja e Meteorologjisë parashikoi një rrezik të lartë, ekstrem ose katastrofik nga zjarret për pjesën më të madhe të Australisë jugore dhe lindore sot, me erëra të forta që pritet të vazhdojnë deri në mbrëmje.
Zëdhënësi i Qendrës së Kontrollit Shtetëror, Luke Hegarty, tha se i gjithë shteti duhet të qëndrojë vigjilent.
Kushtet pritet të lehtësohen të dielën, me parashikime të shiut të dendur në pjesën më të madhe të Victorias.
