Policia e Kosovës ka arrestuar kryetarin e Komunës së Istogut, Haki Rugovën. Kështu ka bërë të ditur deputeti i Lëvizjes Vetëvendosje, Enver Haliti.
Ai gjatë seancës së Kuvendit ku po raportonte kryeministri Hoti, tha se kanë marr lajmin që kreu i Istogut së bashku me nënkryetarin e Komunës dhe një zyrtar tjetër janë arrestuar për shkak të falsifikimit të dokumenteve dhe keqpërdorimit të detyrës zyrtare.
Haliti: Është arrestuar kryetari i Istogut
“Nuk di se si mund të mbyllet ky raportim me një lajm para 15 min që e morëm që është arrestuar kryetari i Istogut, nënkryetari i LDK-së, Haki Rugova, së bashku me nënkryetarin dhe një zyrtar për falsifikim të dokumenteve dhe keqpërdorim të detyrës zyrtare. Unë mendoj se kjo i përmbys të gjitha ato që i thatë dhe kjo është ëmbëlsira e kësaj nate dhe dua të ju uroj një natë të mirë dhe të qetë”, tha ai.
Rastin ka konfirmuar edhe Policia e Kosovës.
“Mund të konfirmojmë se hetuesit policorë të Drejtorisë për Hetimin e Krimeve Ekonomike dhe Korrupsionit (DHKEK) më, 09.10.2020 kanë intervistuar tre persona në cilësinë e të dyshuarve, nën dyshimin e kryerjes së veprave penale: ‘keqpërdorimi i pozitës apo autoritetit zyrtar’, ‘konflikti i interesit’ dhe ‘falsifikimi i dokumentit zyrtar’”, ka thënë zëdhënësi i Policisë së Kosovës, Bajram Krasniqi.
Të dyshuarit, pas intervistimit me vendim Prokurorit të Shtetit nga Prokuroria Themelore në Pejë, ju është shqiptuar masa e ndalimit prej 48 orësh.
