Arrestimi i gjykatësit të Pejës, dyshohet se mori 6 mijë euro ryshfet për një çështje penale

Policia ka dhënë detaje lidhur me operacionin e arrestimit të një gjyqtarit të Pejës, Sali Berisha.

Nga Policia përshkruhet se gjyqtari i arrestuar, ka marrë kundërligjshëm një shumë të parave deri në 6 mijë euro, për të mos vepruar në cilësinë e gjyqtarit, shkruan lajmui.net.

“Drejtoria për Hetimin e Krimeve Ekonomike dhe Korrupsionit, gjegjësisht Njësiti Rajonal për Hetimin e Krimeve Ekonomike dhe Korrupsionit në Prishtinë, ka pranuar informacione nga viktima, që ka pasqyruar abuzimin e funksioneve gjyqësore, veprime që diskreditojnë pozitën dhe figurën e gjyqtarit si dhe imazhin e sistemit gjyqësor”, thuhet në njoftim.

Gjatë procesit të hetimit preliminar janë ndërmarrë masat adekuate për të identifikuar formën e aplikuar më parë të korrupsionit nga i inkriminuari.

Në koordinim me Prokurorinë Speciale janë aplikuar praktikat e njohura nga Kodi i Procedurës Penale, duke u mbështetur fuqishëm në një hetim profesional të bazuar në dëshmi.

Gjatë aplikimit të masave hetimore është siguruar dyshimi i bazuar se i inkriminuari ka kërkuar realizimin e ofertës, në atë mënyrë që i njëjti kërkon/pranon përfitimin material, (kohë më parë dyshohet se janë dorëzuar nga viktima dhe janë pranuar nga i dyshuari i lartshënuar katër mijë (4.000.00) euro), në mënyrë të drejtpërdrejtë, në mënyrë që mos të veprojë në pajtim me detyrën e tij zyrtare, në cilësinë e gjyqtarit.

Gjatë operacionit policor, të zhvilluar me datën 19 shtator 2019, i inkriminuari ka kërkuar/pranuar shumën prej dymijë (2.000.00) eurove, për të përmbyllur ofertën e precizuar në proces për të finalizuar shumën prej gjashtëmijë (6.000.00) eurove, në lidhje me lëndën/çështjen penale të përmbyllur me aktgjykim kohë më parë.

Pas arrestimit i dyshuari është kontrolluar në prezencën e avokatit mbrojtës, në zyrën e NJRHKEK-së Pejë, me ç’rast i janë gjetur në xhep paratë dymijë (2.000.00) euro, të cilat janë përdorur për aplikimin e masës së fshehtë ‘simulim i veprës së korrupsionit’.

Me aprovim verbal të prokurorit, është kontrolluar banesa e të dyshuarit, ku janë gjetur dhe janë sekuestruar:

  • një armë zjarri, tipi Zaza-min, kalibër: 8mm
  • një karikator dhe dhjetë (10) fishekë të kalibrit 8mm
  • dhjetëmijë euro (10.000.00) euro
  • shkresa, aktgjykime dhe proces verbale gjyqësore

Me urdhër të prokurorit special, i dyshuari është ndaluar në qendër të mbajtjes për 48 orë.