Në Somali është vendosur armëpushim pas përleshjeve që shpërthyen dje brenda forcave të armatosura të vendit në provincën Puntland, transmeton Anadolu Agency (AA).
Konflikti shpërtheu pasi Forcat e Sigurisë Puntland (PSF) refuzuan t’i dorëzonin detyrat detashmenteve tjera të ushtrisë. Është një njësit special i ushtrisë që është trajnuar nga ushtria amerikane dhe ka marrë pjesë në operacione antiterroriste.
Guvernatori i kësaj province, Said Abdullahi Deni deklaroi se pas negociatave në të cilat kanë marrë pjesë liderët e jetës politike dhe publike të atij rajoni, është rënë dakord për ndërprerjen e konfliktit dhe është vendosur armëpushim.
Të paktën 10 ushtarë humbën jetën ndërsa 40 u plagosën në përleshjet e djeshme. Mijëra civilë janë larguar nga shtëpitë e tyre në afërsi të skenës së konfliktit.
Qeveria provinciale beson se luftëtarët e PSF-së kanë shkaktuar trazira në Puntland për disa kohë dhe kanë kërkuar angazhimin e detashmenteve tjera brenda forcave të armatosura somaleze.
Somalia gjendet në një krize të thellë politike dhe të sigurisë ndërsa kërcënimi më i madh i sigurisë është grupi terrorist Al-Shabaab. Si pjesë e misionit paqeruajtës AMISOM dhe me vendim të Këshillit të Sigurimit të OKB-së, në Somali janë vendosur rreth 20 mijë trupa. /aa
