Një grup aktivistësh është mbledhur në anën egjiptiane të pikës kufitare Rafah për të kërkuar hapjen urgjente të kalimit kufitar dhe lejimin e ndihmave humanitare në Rripin e Gazës.
Protesta vjen në një kohë kur situata humanitare në Gaza po përkeqësohet ndjeshëm. Që nga 2 marsi, të gjitha kalimet për mallra drejt Gazës janë mbyllur plotësisht, ndërsa më 18 mars rifilluan sulmet izraelite në territorin e rrethuar. Këto zhvillime kanë shkaktuar mungesa ekstreme të ushqimeve dhe ndihmave bazë për popullatën civile.
Aktivistët bënë thirrje për ndërhyrje të menjëhershme ndërkombëtare dhe denoncuan atë që e cilësojnë si një “bllokadë të qëllimshme” që po dëmton civilët, shumica prej të cilëve janë gra dhe fëmijë.
“Është e papranueshme që ndihmat humanitare të bllokohen ndërsa njerëzit në Gaza po vuajnë nga uria dhe mungesa e kujdesit mjekësor,” tha një nga protestuesit për mediat ndërkombëtare.
Organizatat ndërkombëtare të ndihmës kanë paralajmëruar për një katastrofë të afërt humanitare nëse nuk hapen menjëherë korridoret për ndihma dhe nuk ndalet përshkallëzimi i dhunës. /mesazhi
