Kompania me bazë në Zvicër, e cila ndërtoi gazsjellësin Nord Stream 2 nga Rusia në Gjermani, po shqyrton kërkesën për falimentim, thanë dy burime të njohura me situatën, shkruan Reuters.
Kompania po përpiqet të zgjidhë pretendimet përpara se të përfundojë afati që kanë dhënë Shtetet e Bashkuara të Amerikës.
Shtetet e Bashkuara vunë sanksione mbi Nord Stream 2 AG javën e kaluar pasi Rusia njohu dy rajone të shkëputura në Ukrainën lindore përpara pushtimit të vendit, çka shkaktoi më pas një valë sanksionesh ekonomike nga Perëndimi.
Nord Stream 2 AG, i cili është i regjistruar në Zvicër dhe është në pronësi të gjigantit shtetëror rus të gazit Gazprom, përfundoi vitin e kaluar projektin prej 11 miliardë dollarësh, i cili ishte projektuar për të dyfishuar kapacitetin për të sjellë gazin nga Rusia në Gjermani.
Dy burimet, të cilët folën në kushte anonimiteti, sepse bisedimet për një falimentim të mundshëm janë konfidenciale, thanë se Nord Stream 2 AG ka punuar me një këshilltar financiar për pastrimin e disa prej detyrimeve të tij dhe mund të fillojë zyrtarisht procedurat e falimentimit në një gjykatë zvicerane që këtë javë.
Nord Stream 2 AG nuk iu përgjigj kërkesave për koment nga Reuters. As Gazprom nuk pranoi të komentojë.
Gazsjellësi prej 1230 km nuk kishte filluar funksionimin komercial sepse ishte në pritje të certifikimit nga Gjermania, e cila javën e kaluar e la pezull këtë proces, si rezultat i përshkallëzimit të krizës në Ukrainë.
Zyra e Departamentit të Thesarit të SHBA-së për Kontrollin e Pasurive të Huaja lëshoi një urdhër ekzekutiv më 23 shkurt që autorizon “përfundimin e transaksioneve që përfshijnë Nord Stream 2 AG” ose “çdo subjekt në të cilin Nord Stream 2 AG zotëron, drejtpërdrejt ose tërthorazi, 50 për qind ose më shumë” deri më 2 mars.
Gazprom pagoi gjysmën e kostos së ndërtimit të Nord Stream 2. Pjesa tjetër e gazsjellësit prej 11 miliardë dollarësh u financua nga kompania kryesore britanike e naftës dhe gazit Shell (SHEL.L), OMV e Austrisë (OMVV.VI), Engie e Francës dhe Uniper e Gjermanisë (UN01). DE) dhe Wintershall DEA (WINT.UL).
Shell, Engie dhe Wintershall DEA nuk iu përgjigjën menjëherë kërkesave për koment. OMV nuk pranoi të komentojë. /monitor
