Sekretari amerikan i Shtetit, Marco Rubio, ka riafirmuar angazhimin e SHBA-së ndaj NATO-s në një bisedë me Mark Rutte, Sekretarin e Përgjithshëm të aleancës ushtarake 32-anëtarëshe, transmeton Anadolu.
Rubio i detajoi sekretarit Rutte prioritetet e politikës së jashtme të presidentit Donald Trump dhe ata diskutuan nevojën për aleatë të fuqishëm për mbrojtje dhe ndarje të barabartë të barrës, njoftoi Departamenti i Shtetit.
Bashkëbiseduesit diskutuan gjithashtu përfundimin e luftës së Rusisë në Ukrainë përmes mjeteve paqësore dhe theksuan lidhjen strategjike midis rajonit Euro-Atlantik dhe rajonit Azi-Paqësor.
Në një postim në X, Rutte tha se mezi pret të bashkëpunojë në lidhje me Ukrainën, Rusinë dhe Kinën.
“Rritja e shpenzimeve të mbrojtjes në Evropë dhe rritja e prodhimit të mbrojtjes transatlantike na bën të gjithëve më të fortë”, shtoi ai.
Trump ka kërkuar që anëtarët e aleancës transatlantike të shpenzojnë 5 për qind të PBB-së së tyre për mbrojtjen, një rritje e theksuar nga objektivi aktual prej 2 për qind.
– Rubio bisedoi me homologët izraelitë, egjiptianë, polakë
Rubio gjithashtu zhvilloi bisedime me ministrin e Jashtëm izraelit Gideon Sa’ar dhe ripohoi mbështetjen “të palëkundur” të SHBA-së për Izraelin.
Ai përgëzoi homologun e tij izraelit për lirimin e fundit të pengjeve dhe marrëveshjen e armëpushimit në Gaza, duke u zotuar për përpjekje të vazhdueshme për të liruar pengjet e mbetura dhe përshëndeti rrjedhën e ndihmave humanitare në rajonin e goditur nga lufta.
Diskutimet me Ministrin e Jashtëm egjiptian Badr Abdelatty u përqëndruan në partneritetin strategjik SHBA-Egjipt dhe rëndësinë e këtij partneriteti për promovimin e sigurisë dhe stabilitetit rajonal.
Ata eksploruan përpjekjet rajonale të paqes, ndihmën humanitare në Gaza dhe Rubio falënderoi Abdelatty-n për përpjekjet e tyre gjatë armëpushimit midis Izraelit dhe Hamasit.
Ata diskutuan gjithashtu zhvillimet në Siri dhe nevojën për të parandaluar që Siria të përdoret si bazë për terrorizmin ose të paraqesë një kërcënim për fqinjët e saj.
Në bisedën me Ministrin e Jashtëm të Kosta Rikës, Arnoldo Andre, u trajtua tema e sigurisë, duke u fokusuar në sfidat e migracionit dhe luftimin e krimit transnacional.
Me Ministrin e Jashtëm polak, Radoslaw Sikorski, Rubio diskutoi forcimin e marrëdhënieve SHBA-Poloni, bashkëpunimin e mbrojtjes dhe sigurinë energjetike si komponentë kritikë të partneritetit transatlantik.
