Qeveria e Malit të Zi ka njoftuar të dielën se udhëheqësi i saj, Dritan Abazoviq është në shënjestër të strukturave kriminale në këtë vend dhe se mund të ketë “një lloj hakmarrje ndaj tij për arrestimet e fundit”, shkruan gazeta “Vijesti”.
Abazoviq informoi drejtuesit e policisë se grupet e afërta me oficerin e arrestuar të Agjencisë Kombëtare të Sigurisë (ANB) Petar Lazoviq dhe babanë e tij Zoranin, ish-zyrtar i lartë i policisë, po e shohin atë si fajtorin kryesor për arrestimin e tyre dhe se po planifikojnë një lloj hakmarrjeje.
Ndërkohë, Ministria e të Drejtave të Njeriut dhe Minoriteteve në Mal të Zi ka kërkuar veprime urgjente nga institucionet shtetërore për të përcaktuar të gjitha kërcënimet që vijnë nga strukturat kriminale.
Në komunikatën e këtij dikasteri qeveritar thuhet se “prioriteti kyç i kësaj qeverie është sundimi i ligjit, si domosdoshmëri e integrimit të plotë në BE”.
“Dhe kryeministri Abazoviq është personi që padyshim i jep vrullin dhe vulën më të madhe”, thuhet në komunikatën e Ministrisë të të Drejtave të Njeriut dhe Minoriteteve në Mal të Zi. /koha
