Mungesa e furnizimeve ushqimore në Rripin e Gazës po përkeqësohet çdo ditë e më shumë, duke vënë në rrezik jetën e mijëra fëmijëve. Sipas Ministrisë së Shëndetësisë në Gaza, rreth 60,000 fëmijë janë tashmë në rrezik nga ndërlikime të rënda shëndetësore për shkak të kequshqyerjes.
Mjekët dhe punonjësit humanitarë paralajmërojnë për një krizë humanitare në rritje, ndërsa bllokada izraelite po pamundëson hyrjen e ndihmave jetike në territorin palestinez.
Ndërkohë, urdhrat për zhvendosje të detyruar të dhëna nga ushtria izraelite kanë çuar në mbylljen e 21 qendrave të ushqyerjes, duke ndërprerë trajtimin për rreth 350 fëmijë që ndodhen në gjendje të rëndë kequshqyerjeje, sipas të dhënave nga Kombet e Bashkuara.
Organizatat ndërkombëtare të ndihmës po bëjnë thirrje për ndërhyrje urgjente humanitare, për të shmangur përshkallëzimin e mëtejshëm të kësaj tragjedie. /mesazhi
