Tifozat ”Kuq e Zi” bojkotojnë edhe me Italinë, konfirmojnë prezencën në Spanjë

Ishin fantastikë në ndeshjen me Maqedoninë, duke kënduar papushim në Strumicë.

Edhe pse të paktë në numër, në stadium dëgjohej vetëm shqip nga “Tifozat Kuq e Zi”, aq sa thirrjet e tyre dëgjoheshin edhe në qytezë. Futbollistët kuqezi u përulën në shenjë respekti në fundin e ndeshjes.

Megjithatë, duket se “Tifozat Kuqezi” do të mungojnë sërish në ndeshjen brenda. Edhe pse me Italinë luhet në Shkodër, grupimi lajmëron prezencën për ndeshjen me Spanjën. Kështu, vijon bojkoti i “Tifozave Kuq e Zi” për ndeshjet brenda, ndërsa nga FSHF nuk ka asnjë sinjal afrimi.

“Të dashur tifozë, pas transfertës në FYROM, TKZ do vazhdojë rrugëtimin e saj drejt Spanjës në mbështetjen e pakushtëzuar ndaj Kombëtares tonë. Për këtë arsye, ju njoftojmë që kemi filluar rezervimet për këtë ndeshje. Për më shumë informacione nxitoni të kontaktoni përfaqësuesin e rrethit apo shtetit ku jetoni. Afati i fundit për rezervim: 28 Shtator! Ndeshja luhet më 6 tetor 2017, nga ora 20.45 në stadiumin ‘Estadio Jose Rico Perez’, Alicante. E përjetshme është Shqipëria!”, shkruhet në postimin e grupimit.