Tre civilë kanë humbur jetën dhe 12 të tjerë janë lënduar në një sulm ajror gjatë transferimit në pikën kontrolluese të Turqisë në qytetin Idlib të Sirisë, njoftojnë nga Ministria e Mbrojtjes e Republikës së Turqisë, transmeton Anadolu Agency (AA).
“Ne fuqishëm e dënojmë sulmin i cili shkel marrëveshjet ekzistuese, bashkëpunimin dhe dialogun me Rusinë”, thuhet në kumtesën e ministrisë.
Më herët, një transferim i trupave në Idlib u iniciua për të garantuar sigurinë e pikës kontrolluese numër 9, për të mbajtur të hapura rrugët e furnizimit dhe për të parandaluar viktimat civile në rajon, thuhet në kumtesën e ministrisë.
Sulmi ndodhi në orën 08:55 sipas kohës lokale dhe vrau tre civilë dhe plagosi 12 të tjerë në karvanin turk.
Turqia dhe Rusia në shtator të vitit të kaluar u dakorduan që të shndërrojnë Idlibin në një zonë të deeskalimit në të cilën veçanërisht do të ndaloheshin aktet e agresionit.
Megjithatë, regjimi në vazhdimësi i ka thyer kushtet e armëpushimit, duke nisur sulme të shpeshta brenda zonës së deeskalimit.
Zona e deeskalimit aktualisht është e banuar nga katër milionë civilë, duke përfshirë edhe qindra mijëra njerëz të zhvendosur nga forcat e regjimit nga qytetet e tyre nëpër vite në shtetin e shkatërruar nga lufta.
Siria ka mbetur e bllokuar në një luftë të egër civile që nga fillimi i vitit 2011 kur regjimi i Bashar al-Asadit u përplas me protestat pro-demokratike.
Që atëherë, sipas shifrave të OKB-së, qindra mijëra njerëz janë vrarë dhe mbi 10 milionë të tjerë janë zhvendosur.