SHBA, stuhia e dëborës shkakton probleme me energjinë

Një stuhi e fuqishme dëbore është përplasur mbi shtetet juglindore të Shteteve të Bashkuara, duke marrë jetën e një personi e duke lënë me qindra mijëra të tjerë pa energji elektrike.

Në Karolinën e Veriut është shpallur gjendja e jashtëzakonshme, teksa në disa zona trashësia e dëborës së rënë gjatë fundjavës mbërriti në gjysmë metri. Viktima e ashpërsimit të kushteve të motit është një burrë, i cili vdiq kur një pemë ra mbi makinën e tij.

Me mijëra fluturime janë anuluar ndërkohë në mbarë rajonin.

Mbi 300 000 vetë janë prekur nga ndërprerjet e energjisë elektrike në të dy Karolinat, në Alabama, Tenesi dhe Xhorxhia, ndërsa një paralajmërim për forcën e stuhisë mbetet në fuqi në juglindje. Në disa zona ra aq shumë borë sa linjat e tensionit të lartë u rrëzuan prej peshës së saj.

Rreth 60 aksidente u raportuan në Virxhinia dhe 500 në Karolinën e Veriut. Një shqetësim madhor për autoritetet tani nuk është vetëm bora, por edhe akulli që i ka bërë rrugët tejet të rrezikshme.

Top Channel