Ramush Haradinaj do të prezantojë draft-librin e madh për një marrëveshje me Serbinë

Kryeministri i Kosovës, Ramush Haradinaj ka paralajmëruar që në mbledhjen e ardhshme të Qeverisë të prezantojë një drajt libër për një marrëveshje gjithëpërfshirëse me Serbinë.

Kryeministri ka thënë se për këtë ka angazhuar një ekip të madh të cilët kanë punuar që ky dokument të jetë një draft final para dialogut.

“Në mbledhjen e radhës së Qeverisë, do të prezantojmë para Kabinetit Qeveritarë, draft-librin e madh me kapituj, një bazë e fortë institucionale për një marrëveshje gjithëpërfshirëse legalisht obligative me Serbinë.

Javët e fundit, kam angazhuar një ekip të madh kolegësh të cilët kanë punuar intensivisht që ky dokument të jetë një draft final që përfshinë të gjitha temat e rëndësishme për të cilat ne duhet të dialogojmë me Serbinë. Ky dokument, është dokument i gjallë e i cili në ditët në vijim do të prezantohet tek të gjitha pjesët e shoqërisë sonë në mënyrë që të plotësohet dhe të përfshijë të gjitha temat, që sigurojnë avancim të ofertës sonë.

Në ndërkohë, këtë material tashmë ua kam dërguar të gjithë liderëve të partive politike në Kosovë, vendeve të Quintit dhe Zyrës së BE-së.

Ky projekt voluminoz është bazament pune për ekipin negociator në fazën e ardhshme të dialogut dhe është mbështetje e fuqishme për këtë ekip.

Qeveria e Republikës së Kosovës është e përkushtuar që dialogu me Serbinë të vazhdojë dhe se tani është koha që ky dialog të finalizohet, duke respektuar kushtetutën, sovranitetin dhe integritetin e vendit.

Dialogu është detyra e radhës për ta përfunduar konsolidimin e shtetit të Kosovës dhe ngjashëm si për temat e mëdha të vendit edhe këtu na duhet një unitet i plotë.

Uniteti na forcon të gjithëve” shkruan Haradinaj në njoftim./Indeksonline/