Populli i Kosovës i ka borxh dr. Shefqet Krasniqit

Shkruan: Mustafa Terniqi

Mos u habit nga egërsia dhe ashpërsia e armikut kundrejt teje kur më parë të shitën miqtë dhe njerëzit e tu. Miqësia dhe shoqëria e vërtetë të mbron kurdoherë. Andaj dhe feja islame e shikon miqësinë dhe shoqërinë si koncept të lidhur ngushtë me vëllazërinë.

Pejgamberi a.s ka thënë: “Muslimani është vëlla i muslimanit, nuk i bën padrejtësi atij, nuk e nëcmon dhe nuk e braktis atë.” Transmetoi Muslimi.

Edhe hoxha i nderuar Shefqet Krasniqi sprova kryesore që i ka rënë është pikërisht nga mungesa e perceptimit dhe zbatimit të këtij hadithi profetik nga vetë muslimanët.

Përndryshe ajo që kemi parë vazhdimisht nga hoxha i nderuar është xhelozia për Kosovën dhe popullin e saj, përpjekja e vazhdueshme për të luftuar shthurjen, drogën, alkoolin dhe degjenerimin tek të rinjtë, për tu treguar atyre edukatën, etikën dhe moralin e vërtetë.

Sidoqoftë historia na ka treguar se popujt të cilët luftuan profetët e tyre Zoti i ndëshkoi me dënime të ndryshme. Edhe ai popull që ha dhe bluan hoxhallarët e vet është i destinuar të shkatërrohet.

Andaj dhe populli i Kosovës, muslimanët, hoxhallarët dhe pushtetarët duhet të tregojnë pikërisht sot solidaritetin e sinqertë me Dr. Shefqetin e nuk duhet t’i mohojnë mundimet dhe energjitë e hoxhës së nderuar për një Kosovë të lirë gjatë luftës dhe për një Kosovë me moral dhe larg korrupsionit pas luftës. Në të kundërtën nëse shet sot shumë lirë kapacitetet e një vendi nesër je i destinuar të shkatërrosh vetveten me duart e tua.

Njeriu i sinqertë vuan por nuk zhduket.