Pas publikimit të fotografisë nga Flora Brovina, të hënën organizohet marsh protestues

Qendra Kosovare për Rehabilitimin e të Mbijetuarve të Torturës, ka njoftuar se të hënën do të mbahet marsh protestues në mbështetje të të mbijetuarve të dhunës seksuale gjatë luftës në Kosovë.

“Pas publikimit të fotografisë nga deputetja e Kuvendit të Kosovës, Flora Brovina, me të cilën pretendohej se paraqet kryerjen e dhunimeve seksuale gjatë luftës në Kosovë, e cila fotografi doli të jetë e dyshimte, ka pasur reagime të shumta nga të mbijetuarit e dhunës seksuale gjatë luftës në Kosovë, e posaçërisht nga familjarët e tyre.

Për shumë vite kërkuam njohje ligjore dhe qasje në drejtësi për të mbijetuarit e dhunës seksuale gjatë luftës, ndërsa pikërisht tani kur ka filluar njohja e statusit ligjor të tyre, rrënohet gjithçka, duke tentuar të manipulohet me dhimbjen dhe plagët që bartin të mbijetuarit dhe familjarët e tyre”, thuhet në njoftimin për media.

Më tej në njoftimin e KRCT-së thuhet se shumë të mbijetuar dhe familjarë të tyre janë në ankth nga paraqitja e atyre imazheve neveritëse, sidomos kur paraqitja e tyre është bërë nga një deputete e Kuvendit të Kosovës dhe aktiviste e të drejtave të njeriut.

“Prandaj, duke marrë parasysh faktin se të mbijetuarit e dhunës seksuale nuk munden të dalin hapur në këtë marsh, ju ftojmë të gjithëve që të na bashkëngjiteni në marshin protestues, në mbështetje të të mbijetuarve të dhunës seksuale gjatë luftës në Kosovë, duke kërkuar përgjegjësi nga institucionet e vendit si dhe solidarizim dhe drejtësi për të mbijetuarit e dhunës seksuale gjatë luftës në Kosovë”, thuhet në njoftim.

Takimi i pjesëmarrësve do të bëhet në Sheshin Zahir Pajaziti, në ora 12.00, dhe marshi do të vazhdoj deri para hyrjes së Kuvendit të Kosovës.

Organizuar nga organizatat që përfaqësojnë të mbijetuarit e dhunës seksuale gjatë luftës në Kosovë:
1. Qendra Kosovare për rehabilitimin e të Mbijetuarve të Torturës – QKRMT
2. Rrjeti i Grave të Kosovës
3. Medika Kosova
4. Medika Gjakova
5. Qendra për Promovimin e të Drejtave të Grave në Drenas
6. Shoqata Drejtësi për të Gjithë.

SHPËRNDAJE