Mehmeti: Të mos prodhojmë përçarje

Shkrimtari dhe publicisti shqiptar nga Maqedonia, Kim Mehmeti është shprehur kritik ndaj debatit pas vizitës së kryeministrit Edi Rama në Beograd.

Në një intervistë dhënë “Epokës së re”, ai i ka ftuar analistët dhe politikanët nga Shqipëria dhe Kosova që të kenë kujdes me fjalën e tyre publike dhe të mos prodhojnë përçarje në mes të shqiptarëve.

Sipas tij, zhurma mediatike e krijuar tregon edhe për stereotipat krahinore, fetare e dialektore që i kanë krijuar shqiptarët për njëri-tjetrin.

Mehmeti ka vlerësuar paraqiten e Edi Ramës në Serbi, duke thënë se burrështetasit shqiptarë duhet të nxiten të mendojnë dhe të veprojnë ‘shqip’ dhe sa herë që u jepet rasti, të kontribuojnë në të mirën e gjithë shqiptarisë.